News

04.08.2021

Lagerbericht St. Moritz 02.08.2021

Bericht von Mara, Luisa, Chantal, Estelle

Hüt Morge sind mer mit de Sonne im G’sicht ufgwacht. Wo mer mit em Z’morge i Ässruum cho sind, hemer g’seh, dass Decki nüme so dicht isch.

Am 09:30 hed für alli uf de Alag s’Training a’gfange. U16 und U18+ hed sich dur de Johanna ihres I’wärme dureboge und durebisse. Und U14 hed es spassigs I’wärme gha mit de Vanessa und de Debi. D’U14 hed Chuggle gschtosse fast wie die grosse. Und sie sind au bim Wiitsprung ganz wiit gumpet und das isch ine au ganz guet g’lunge. Hoch isch hüt d’U16 gschprunge und hed s’Seili überrunge. Am Schluss hed’s no paar Sprintlis gäh und die Motivation hend sie sich ned la näh. Die Ältischte sind us em Startpflock usegschprintet und hend die andere us de Bahn useginget. Wurf hend d’Spezialiste gmacht und Barbi hed sie überwacht.

Mit Hunger im Buch simer go Z’mittag ässe und ja D’isziplin Stabhochsprung hemer ganz vergässe.

Nach em Ässe hemer üs mit de Olympiade vergnüegt. Churz nach em Mittag sind die Erste scho weder uf d’Alag go Wurf und Stab mache. Uf die 15:30 sind die andere au cho. U14 und U16 hend zäme Ufgwärmt. Natürlich dörf das bi de U18+ au nöd fäle. Unter de Ufsicht vo de Vanessa hed U14 Starts g’macht. Mit em erfahrene Bru hed U16 Diskus gmacht. Bim Ramon isch U16 über d’Hürde gfloge. U18+ hed bim Florin und de Johanna Staffle ka. Bi de Profi Pätschi hend die einte Wiitsprung ka. Nach em Dusche sind sich alle bim Büffe go bediene. Mit Salat, Pilzragout und Pastetli hemer üs d’Mäge vollgässe (Morn wird’s sicher rägne : /)

Am Abig hemer en lustigi Ziit gha mit em Spiel Time-is-up. Nachher hemer üs i üsi Better verchroche.

De Tag hed besser gar nöd chöne si, drum schlafed mer jetzt i. : )

Diese Website nutzt Cookies, um bestmögliche Funktionalität bieten zu können. Erfahren Sie mehr auf unserer Datenschutzerklärung.